sangrur-gears-up-for-civil-defence-air-raid-blackout-mock-drill-on-april-24

ਸੰਗਰੂਰ 24 ਅਪ੍ਰੈਲ ਦੀ ਰਾਤ 8 ਵਜੇ ਸਿਵਲ ਡਿਫੈਂਸ ਏਅਰ ਰੇਡ ਅਤੇ ਬਲੈਕਆਉਟ ਮੌਕ ਡ੍ਰਿਲ ਲਈ ਤਿਆਰ

Apr23,2026 | Narinder Kumar | Sangrur

-ਡੀਸੀ ਰਾਹੁਲ ਚਾਬਾ ਵੱਲੋਂ ਸ਼ਹਿਰ ਵਿਆਪੀ ਬਲੈਕਆਉਟ ਮੌਕ ਅਭਿਆਸ ਲਈ ਤਿਆਰੀ ਦਾ ਜਾਇਜ਼ਾ; ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ

-ਸਿਵਲ ਹਸਪਤਾਲ ਨੂੰ ਛੱਡ ਕੇ ਸਾਰੇ ਸ਼ਹਿਰ ਦੀ ਬਿਜਲੀ ਪੰਦਰਾਂ ਮਿੰਟ ਲਈ ਹੀ ਬੰਦ ਰਹੇਗੀ

24 ਅਪ੍ਰੈਲ ਦੀ ਰਾਤ 8:00 ਵਜੇ ਤੋਂ 8:15 ਵਜੇ ਤੱਕ ਸੰਗਰੂਰ ਸ਼ਹਿਰ ਵਿੱਚ ਹੋਣ ਵਾਲੇ ਪਹਿਲੇ ਸਿਵਲ ਡਿਫੈਂਸ ਏਅਰ ਰੇਡ ਅਤੇ ਬਲੈਕਆਉਟ ਮੌਕ ਅਭਿਆਸ ਦੇ ਮੱਦੇਨਜ਼ਰ ਸੰਗਰੂਰ ਦੇ ਡਿਪਟੀ ਕਮਿਸ਼ਨਰ ਰਾਹੁਲ ਚਾਬਾ ਨੇ ਅੱਜ ਇੱਥੇ ਫੌਜ, ਪੁਲਿਸ, ਹੋਮ ਗਾਰਡਜ, ਸਿਹਤ ਵਿਭਾਗ, ਬਿਜਲੀ ਅਤੇ ਹੋਰ ਸਬੰਧਤ ਵਿਭਾਗਾਂ ਦੇ ਅਧਿਕਾਰੀਆਂ ਨਾਲ ਇੱਕ ਵਿਆਪਕ ਮੀਟਿੰਗ ਕੀਤੀ।

ਮੀਟਿੰਗ ਦੀ ਪ੍ਰਧਾਨਗੀ ਕਰਦੇ ਹੋਏ, ਡਿਪਟੀ ਕਮਿਸ਼ਨਰ ਨੇ ਸਪੱਸ਼ਟ ਕੀਤਾ ਕਿ ਇਹ ਅਭਿਆਸ ਪੂਰੀ ਤਰ੍ਹਾਂ ਇੱਕ ਮੌਕ ਡ੍ਰਿਲ ਹੈ ਜਿਸਦਾ ਉਦੇਸ਼ ਕਿਸੇ ਵੀ ਐਮਰਜੈਂਸੀ ਸਥਿਤੀ ਵਿੱਚ ਤਿਆਰੀ ਅਤੇ ਹੰਗਾਮੀ ਸਥਿਤੀ ਨਾਲ ਨਜਿੱਠਣ ਦਾ ਮੁਲਾਂਕਣ ਕਰਨਾ ਹੈ। ਉਨ੍ਹਾਂ ਨੇ ਲੋਕਾਂ ਨੂੰ ਕਿਸੇ ਵੀ ਤਰ੍ਹਾਂ ਘਬਰਾਉਣ ਅਤੇ ਅਫਵਾਹਾਂ ਫੈਲਾਉਣ ਜਾਂ ਵਿਸ਼ਵਾਸ ਕਰਨ ਤੋਂ ਬਚਣ ਦੀ ਅਪੀਲ ਕੀਤੀ ਹੈ।

ਰਾਹੁਲ ਚਾਬਾ ਨੇ ਸਾਰੇ ਵਿਭਾਗਾਂ ਨੂੰ ਪੂਰੀ ਤਰ੍ਹਾਂ ਤਿਆਰ ਰਹਿਣ ਅਤੇ ਡ੍ਰਿਲ ਦੌਰਾਨ ਪ੍ਰਭਾਵਸ਼ਾਲੀ ਤਾਲਮੇਲ ਨੂੰ ਯਕੀਨੀ ਬਣਾਉਣ ਦੇ ਨਿਰਦੇਸ਼ ਦਿੱਤੇ, ਖਾਸ ਕਰਕੇ ਹਵਾਈ ਹਮਲਿਆਂ ਅਤੇ ਬਲੈਕਆਉਟ ਸਥਿਤੀਆਂ ਨਾਲ ਸਬੰਧਤ ਸਥਿਤੀਆਂ ਲਈ। ਉਨ੍ਹਾਂ ਦੱਸਿਆ ਕਿ ਸੰਗਰੂਰ ਸ਼ਹਿਰ ਵਿੱਚ ਸਿਵਲ ਹਸਪਤਾਲ ਨੂੰ ਛੱਡ ਕੇ ਬਿਜਲੀ ਸਪਲਾਈ ਰਾਤ 8:00 ਵਜੇ ਸਿਰਫ਼ 15 ਮਿੰਟ ਲਈ ਬੰਦ ਕੀਤੀ ਜਾਵੇਗੀ, ਜਦੋਂ ਕਿ ਮੁੱਖ ਮੌਕ ਡ੍ਰਿਲ ਗਤੀਵਿਧੀਆਂ ਸਥਾਨਕ ਆਰਮੀ ਏਰੀਆ ਵਿੱਚ ਕੀਤੀਆਂ ਜਾਣਗੀਆਂ।

ਅਜਿਹੀਆਂ ਪਹਿਲਕਦਮੀਆਂ ਦੀ ਮਹੱਤਤਾ ਨੂੰ ਉਜਾਗਰ ਕਰਦੇ ਹੋਏ, ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ, ਭਾਰਤ ਸਰਕਾਰ ਦੇ ਗ੍ਰਹਿ ਮੰਤਰਾਲੇ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ, ਅਜਿਹੀ ਮੌਕ ਡ੍ਰਿਲ ਸਾਲ ਵਿੱਚ ਦੋ ਵਾਰ ਕੀਤੀ ਜਾਣੀ ਹੈ। ਇਹ ਪਹਿਲੀ ਡ੍ਰਿਲ ਹੋਵੇਗੀ ਜਿਸ ਵਿੱਚ ਪੁਲਿਸ, ਫੌਜ, ਅੱਗ ਬੁਝਾਊ, ਸਿਹਤ, ਬਿਜਲੀ ਅਤੇ ਸਿਵਲ ਡਿਫੈਂਸ ਏਜੰਸੀਆਂ ਸਮੇਤ ਹੋਰਨਾਂ ਵਿਭਾਗਾਂ ਦੀ ਤਾਲਮੇਲ ਸ਼ਾਮਲ ਹੋਵੇਗਾ।

ਡਿਪਟੀ ਕਮਿਸ਼ਨਰ ਨੇ ਲੋਕਾਂ ਨੂੰ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਅਤੇ ਜਨਤਕ ਵਿਵਸਥਾ ਬਣਾਈ ਰੱਖਣ ਲਈ ਬਲੈਕਆਊਟ ਦੌਰਾਨ ਜਾਰੀ ਕੀਤੀਆਂ ਗਈਆਂ ਸਾਰੀਆਂ ਸਲਾਹਾਂ ਦੀ ਸਖ਼ਤੀ ਨਾਲ ਪਾਲਣਾ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਸਾਰੇ ਅਧਿਕਾਰੀਆਂ ਨੂੰ ਹਦਾਇਤਾਂ ਦੀ ਸਖ਼ਤੀ ਨਾਲ ਪਾਲਣਾ ਯਕੀਨੀ ਬਣਾਉਣ ਲਈ ਵੀ ਨਿਰਦੇਸ਼ ਦਿੱਤੇ।

ਐਸਐਸਪੀ ਸਰਤਾਜ ਸਿੰਘ ਚਾਹਲ ਦੀ ਨੁਮਾਇੰਦਗੀ ਕਰਦੇ ਹੋਏ, ਡੀਐਸਪੀ ਕਰਨੈਲ ਸਿੰਘ ਨੇ ਸੰਗਰੂਰ ਪੁਲਿਸ ਦੁਆਰਾ ਆਮ ਜਨਤਾ ਲਈ ਜਾਰੀ ਕੀਤੇ ਗਏ ਸੁਰੱਖਿਆ ਦਿਸ਼ਾ-ਨਿਰਦੇਸ਼ਾਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਪੁਲਿਸ ਵੱਲੋਂ ਲੋਕਾਂ ਨੂੰ ਬਲੈਕਆਊਟ ਦੌਰਾਨ ਰੌਸ਼ਨੀ ਦੇ ਅਨੁਸ਼ਾਸਨ ਦੀ ਸਖ਼ਤੀ ਨਾਲ ਪਾਲਣਾ ਕਰਨ ਦੀ ਸਲਾਹ ਦਿੱਤੀ ਗਈ ਹੈ, ਖਿੜਕੀਆਂ ਵਿੱਚੋਂ ਰੌਸ਼ਨੀ ਬਾਹਰ ਦਿੱਸਣ ਤੋਂ ਰੋਕਣ ਲਈ ਮੋਟੇ ਪਰਦੇ ਲਗਾਏ ਜਾਣ ਅਤੇ ਸਾਰੀਆਂ ਬਾਹਰੀ ਲਾਈਟਾਂ ਬੰਦ ਕਰਨ ਦੀ ਅਪੀਲ ਕੀਤੀ ਗਈ ਹੈ।

ਨਿਵਾਸੀਆਂ ਨੂੰ ਸੁਰੱਖਿਆ ਖਤਰਿਆਂ ਦੇ ਕਾਰਨ ਘਰਾਂ ਜਾਂ ਗੈਰਾਜਾਂ ਵਰਗੀਆਂ ਬੰਦ ਥਾਵਾਂ ਦੇ ਅੰਦਰ ਪੋਰਟੇਬਲ ਜਨਰੇਟਰ ਚਲਾਉਣ ਤੋਂ ਵੀ ਸਾਵਧਾਨ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ, ਬਲੈਕਆਊਟ ਦੌਰਾਨ ਆਟੋਮੈਟਿਕ ਲਾਈਟਿੰਗ ਵਾਲੇ ਬਾਹਰੀ ਸੀਸੀਟੀਵੀ ਕੈਮਰੇ ਦੀ ਲਾਈਟ ਬੰਦ ਹੋਵੇ ਜਾਂ ਇੱਸ ਨੂੰ ਸਹੀ ਢੰਗ ਨਾਲ ਢੱਕਿਆ ਹੋਣੇ ਚਾਹੀਦਾ ਹੈ।

ਜਨਤਕ ਆਵਾਜਾਈ ਦੇ ਸੰਬੰਧ ਵਿੱਚ, ਨਾਗਰਿਕਾਂ ਨੂੰ ਘਰ ਦੇ ਅੰਦਰ ਰਹਿਣ ਅਤੇ ਬੇਲੋੜੀ ਯਾਤਰਾ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ, ਕਿਉਂਕਿ ਬਲੈਕਆਊਟ ਸਥਿਤੀਆਂ ਸਮੇਂ ਹਨੇਰੇ ਕਾਰਨ ਹਾਦਸੇ ਹੋ ਸਕਦੇ ਹਨ। ਵਾਹਨ ਚਾਲਕਾਂ ਨੂੰ ਬਲੈਕਆਊਟ ਸਮੇਂ ਦੌਰਾਨ ਗੱਡੀਆਂ ਦੀ ਹੈੱਡਲਾਈਟਾਂ ਬੰਦ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਅਜਿਹੀ ਸਥਿਤੀ ਵਿੱਚ ਬਾਹਰ ਨਹੀਂ ਨਿਕਲਣਾ ਚਾਹੀਦਾ ਪਰੰਤੂ ਜੇਕਰ ਕਿਸੇ ਨਾ ਟਾਲੇ ਜਾਣ ਵਾਲੇ ਕਾਰਨ ਬਾਹਰ ਜਾਣਾ ਪੈਂਦਾ ਹੈ ਤਾਂ ਆਪਣੇ ਪਛਾਣ ਦਸਤਾਵੇਜ਼ ਆਪਣੇ ਨਾਲ ਰੱਖਣੇ ਚਾਹੀਦੇ ਹਨ, ਅਤੇ ਗਸ਼ਤ ਅਤੇ ਨਾਕਾ ਡਿਊਟੀਆਂ 'ਤੇ ਤਾਇਨਾਤ ਪੁਲਿਸ ਕਰਮਚਾਰੀਆਂ ਨਾਲ ਪੂਰਾ ਸਹਿਯੋਗ ਕਰਨਾ ਚਾਹੀਦਾ ਹੈ।

ਕਿਸੇ ਵੀ ਐਮਰਜੈਂਸੀ ਲਈ, ਲੋਕ ਤੁਰੰਤ ਸਹਾਇਤਾ ਲਈ ਐਮਰਜੈਂਸੀ ਹੈਲਪਲਾਈਨ ਨੰਬਰਾਂ 112 ਜਾਂ 100 'ਤੇ ਸੰਪਰਕ ਕਰ ਸਕਦੇ ਹਨ, ਜਦੋਂ ਕਿ ਬਿਜਲੀ ਨਾਲ ਸਬੰਧਤ ਜਾਣਕਾਰੀ ਬਿਜਲੀ ਨਿਗਮ ਦੀ ਹੈਲਪਲਾਈਨ ਤੋਂ ਲਈ ਜਾਵੇ।

ਮੀਟਿੰਗ ਵਿੱਚ ਸਥਾਨਕ ਫੌਜੀ ਅਧਿਕਾਰੀ, ਸਿਵਲ ਸਰਜਨ ਡਾ. ਅਮਰਜੀਤ ਕੌਰ, ਬਿਜਲੀ ਨਿਗਮ ਦੇ ਕਾਰਜਕਾਰੀ ਇੰਜੀਨੀਅਰ ਵਰਿੰਦਰ ਦੀਪਕ, ਹੋਮ ਗਾਰਡ ਅਧਿਕਾਰੀ ਅਮਰਿੰਦਰ ਸਿੰਘ ਅਤੇ ਹੋਰ ਸੀਨੀਅਰ ਅਫਸਰ ਸ਼ਾਮਲ ਸਨ।

sangrur-gears-up-for-civil-defence-air-raid-blackout-mock-drill-on-april-24