pau-department-of-entomology-conducted-a-field-day-on-integrated-management-of-lice-prevention

ਪੀ.ਏ.ਯੂ. ਦੇ ਕੀਟ ਵਿਗਿਆਨ ਵਿਭਾਗ ਨੇ ਜੂੰਆਂ ਦੀ ਰੋਕਥਾਮ ਦੇ ਸੰਯੁਕਤ ਪ੍ਰਬੰਧ ਬਾਰੇ ਖੇਤ ਦਿਵਸ ਕਰਵਾਇਆ

May28,2024 | Narinder Kumar | Ludhiana

ਪੀ.ਏ.ਯੂ. ਦੇ ਕੀਟ ਵਿਗਿਆਨ ਵਿਭਾਗ ਨੇ ਆਲ ਇੰਡੀਆ ਨੈੱਟਵਰਕ ਦੇ ਤਹਿਤ ਕ੍ਰਿਸ਼ੀ ਵਿਗਿਆਨ ਕੇਂਦਰ ਨਾਲ ਮਿਲ ਕੇ ਖੇਤ ਦਿਵਸ ਕਰਵਾਇਆ| ਇਹ ਖੇਤ ਦਿਵਸ ਸਬਜ਼ੀਆਂ ਦੀਆਂ ਫ਼ਸਲਾਂ ਉੱਪਰ ਜੂੰਆਂ ਦੀ ਰੋਕਥਾਮ ਦੇ ਸੰਯੁਕਤ ਪ੍ਰਬੰਧ ਸੰਬੰਧੀ ਜਾਣਕਾਰੀ ਦੇਣ ਲਈ ਸੀ| ਇਸ ਸਮਾਰੋਹ ਨਾਲ ਕਿਸਾਨਾਂ ਨੂੰ ਸਬਜ਼ੀਆਂ ਦੀਆਂ ਮੁੱਖ ਜੂੰਆਂ ਅਤੇ ਉਹਨਾਂ ਦੀ ਰੋਕਥਾਮ ਦੇ ਤਰੀਕੇ ਸੁਝਾਏ ਗਏ|

ਪ੍ਰੋਜੈਕਟ ਦੇ ਮੁੱਖ ਵਿਗਿਆਨੀ ਡਾ. ਮਨਮੀਤ ਬਰਾੜ ਭੁੱਲਰ ਨੇ ਸੁਰੱਖਿਅਤ ਖੇਤੀ ਅਧੀਨ ਸਬਜ਼ੀਆਂ ਦੀਆਂ ਮੁੱਖ ਜੂੰਆਂ, ਉਹਨਾਂ ਦੀ ਪਛਾਣ ਅਤੇ ਉਹਨਾਂ ਵੱਲੋਂ ਕੀਤੇ ਜਾਣ ਵਾਲੇ ਨੁਕਸਾਨ ਦੇ ਨਾਲ-ਨਾਲ ਜੂੰਆਂ ਦੇ ਕੁਦਰਤੀ ਵਿਰੋਧੀਆਂ ਬਾਰੇ ਜਾਣਕਾਰੀ ਦਿੱਤੀ| ਉਹਨਾਂ ਨੇ ਜੂੰਆਂ ਦੀ ਰੋਕਥਾਮ ਦੇ ਵਾਤਾਵਰਨ ਪੱਖੀ ਤਰੀਕੇ ਸੁਝਾਉਣ ਦੇ ਨਾਲ-ਨਾਲ ਖੀਰੇ ਅਤੇ ਸ਼ਿਮਲਾ ਮਿਰਚ ਦੀ ਜੂੰਅ ਦੀ ਰੋਕਥਾਮ ਦੇ ਸੰਯੁਕਤ ਤਰੀਕਿਆਂ ਬਾਰੇ ਜਾਣਕਾਰੀ ਦਿੱਤੀ|

ਡਾ. ਪਰਮਜੀਤ ਕੌਰ ਨੇ ਖੁੱਲੇ ਖੇਤ ਵਿਚ ਭਿੰਡੀ ਅਤੇ ਬੈਂਗਣ ਵਿਚ ਜੂੰਆਂ ਦੀ ਰੋਕਥਾਮ ਬਾਰੇ ਕਿਸਾਨਾਂ ਨੂੰ ਜਾਗਰੂਕ ਕੀਤਾ| ਉਹਨਾਂ ਨੇ ਵਿਸਥਾਰ ਵਿਚ ਦੱਸਿਆ ਕਿ ਇਹਨਾਂ ਜੂੰਆਂ ਦੀ ਪਛਾਣ, ਇਹਨਾਂ ਦੇ ਨੁਕਸਾਨ ਅਤੇ ਨੁਕਸਾਨ ਨੂੰ ਘੱਟ ਕਰਨ ਦੇ ਤਰੀਕੇ ਕੀ ਹੋ ਸਕਦੇ ਹਨ|

ਕ੍ਰਿਸ਼ੀ ਵਿਗਿਆਨ ਕੇਂਦਰ ਨੂਰਮਹਿਲ ਦੇ ਉਪਨਿਰਦੇਸ਼ਕ ਡਾ. ਸੰਜੀਵ ਕਟਾਰੀਆ ਨੇ ਜੂੰਆਂ ਦੀ ਜੈਵਿਕ ਤਰੀਕਿਆਂ ਨਾਲ ਰੋਕਥਾਮ ਲਈ ਕਿਸਾਨਾਂ ਨੂੰ ਪ੍ਰੇਰਿਤ ਕਰਦਿਆਂ ਸਮੇਂ-ਸਮੇਂ ਢੁੱਕਵੀਂ ਜਾਣਕਾਰੀ ਲਈ ਯੂਨੀਵਰਸਿਟੀ ਦੇ ਸ਼ੋਸ਼ਲ ਮੀਡੀਆ ਨਾਲ ਜੁੜਨ ਦੀ ਜਾਣਕਾਰੀ ਦਿੱਤੀ| 70 ਦੇ ਕਰੀਬ ਕਿਸਾਨ ਅਤੇ ਕਿਸਾਨ ਬੀਬੀਆਂ ਇਸ ਖੇਤ ਦਿਵਸ ਵਿਚ ਸ਼ਾਮਿਲ ਸਨ| ਡਾ. ਕਟਾਰੀਆ ਨੇ ਕਿਸਾਨਾਂ ਅਤੇ ਖੇਤੀ ਮਾਹਿਰਾਂ ਦਾ ਧੰਨਵਾਦ ਵੀ ਕੀਤਾ|

pau-department-of-entomology-conducted-a-field-day-on-integrated-management-of-lice-prevention